Ֆասթ Բանկի գործադիր տնօրենի և տնօրինության նախագահի պաշտոնում նշանակվել է Տարոն Գանջալյանը
Ֆասթ Բանկը շարունակում է իր արագ և կայուն զարգացման ուղին՝ ընդլայնելով գործունեության մասշտաբները և թևակոխելով զարգացման կարևոր փուլ, որտեղ որակի գերակայությունը գլխավոր ուղենիշն է։ Ֆասթ Բանկի զարգացման նոր շրջափուլը նշանավորվում է միջազգային հարուստ փորձ ունեցող, կառավարման նոր մշակույթ բերող ղեկավար Տարոն Գանջալյանի նշանակմամբ՝ Բանկի գործադիր տնօրեն-տնօրինության նախագահի պաշտոնում։
Տարոն Գանջալյանն ավելի քան 25 տարվա մասնագիտական փորձ ունի բանկային, ներդրումային և ֆինանսական ոլորտներում՝ ռազմավարական կառավարման, ակտիվների կառավարման և ներդրումային ռազմավարությունների մշակման ու իրականացման ուղղություններով։ Իր մասնագիտական գործունեության ընթացքում նա աշխատել է միջազգային ֆինանսական կառույցներում և ներգրավված է եղել ֆինանսական կազմակերպությունների զարգացմանն ու ռազմավարական որոշումների կայացմանը վերաբերող գործընթացներում։
Տարոն Գանջալյանը երկար տարիներ զբաղեցրել է նիդերլանդական LINKS Analytics B.V. հարթակի գործադիր տնօրենի պաշտոնը, եղել է Shell Asset Management Company BV-ի ֆոնդերի կառավարիչ, իսկ ներկայումս հանդիսանում է Xalq Banki-ի անկախ խորհրդի անդամ։ Տարոն Գանջալյանն ունի University of Essex/Central European University-ի տնտեսագիտության մագիստրոսի աստիճան, ինչպես նաև London Business School-ում ստացել է բիզնեսի կառավարման մագիստրոսի (MBA) որակավորում։
Ֆասթ Բանկը հավատարիմ է մնում իր որդեգրած առաքելությանը՝ լինել մեկ քայլ առաջ հաճախորդների պահանջմունքներից՝ շարունակաբար զարգացնելով իր ծառայությունները, ներդնելով նորարարական լուծումներ և ստեղծելով առավել արդյունավետ ու հասանելի ֆինանսական միջավայր։ Բանկը զարգանում է որպես ժամանակակից ֆինանսական կառույց՝ համադրելով տեխնոլոգիական հնարավորությունները, սպասարկման բարձր չափանիշներն ու հաճախորդակենտրոն մոտեցումը։
Ֆասթ Բանկը շարունակաբար ընդլայնում է իր ծառայությունների շրջանակը՝ առաջարկելով արագ, հարմարավետ և անվտանգ ֆինանսական լուծումներ Երևանում և Հայաստանի բոլոր մարզերում՝ նպատակ ունենալով ստեղծել առավել պարզ, հասանելի և արդյունավետ բանկային փորձառություն յուրաքանչյուր հաճախորդի համար։
Ֆասթ Բանկը վերահսկվում է ՀՀ Կենտրոնական բանկի կողմից: